Pas shpalljes së COVID-19, si pandemi nga ana e Organizatës Botërore të Shëndetësisë dhe miratimit të masave parandaluese nga ana e Qeverisë së Kosovës, Kryetari i Malishevës, Ragip Begaj, në kuadër të kompetencave të tij, sot i ka takuar të gjitha organet dhe sektorët përgjegjës, nga të cilët ka kërkuar zbatimin në përpikëri të të gjitha masave parandaluese kundër COVID-19, apo i njohur në opinion si virusi korona.
Begaj, gjithashtu ka shprehur edhe shqetësimin e tij për mundësinë e krijimit të panikut dhe ka ju bërë thirrje qytetarëve që të jenë të qetë pasi aktualisht nuk ka vend për shqetësim.
Për këtë qëllim sot, kreu i Malishevës ka mbajtur një takim të përbashkët me drejtorin komunal për shëndetësi, Liridon Hotin, drejtorin e inspektoratit, Dibran Kastratin, drejtorin për mbrojtje dhe shpëtim, Valon Gashin, si dhe me zëvendëskomandantin e stacionit policor, togerin policor Zenel Halitaj. Po ashtu për këtë qëllim, sot e ka vizituar edhe QKMF-në në Malishevë, ku është drejtorin Nuhi Morina, nga i cili ka kërkuar edhe krijimin e ekipeve të veçanta mobile, në rast nevoje, për ofrimin e shërbimeve të shëndetësore shtëpiake.
Begaj, ka kërkuar të gjitha organet e përmendura për marrjen e të gjitha masave për zbatimin e përpiktë të udhëzimeve me qëllim të parandalimit të COVID-19, edhe pse ende nuk kemi raste të infeksionit me këtë virus.
Inspektorët komunal janë urdhëruar për mbikëqyrjen e tregut në përgjithësi, të cilët gjithashtu duhet të zbatojnë masat parandaluese, por edhe për rritjen e çmimeve dhe të regjistrohen të gjitha këto raste dhe të dërgohen raportet në organet kompetente. Mirëpo, sipas inspektorëve komunal, të cilët nga orët e para janë duke kontrolluar marketet, në qytetin e Malishevës, nuk vërehet rritje e çmimeve.
Gjithashtu, pasi Komuna e Malishevës, njihet me numrin e madh të të punësuarve në Itali dhe vende tjera në Evropë, e një pjesë të cilëve janë kthyer ditëve të fundit, janë duke u regjistruar dhe duke u mbikëqyrur nga ana e profesionistëve shëndetësor dhe organeve të rendit.
Luten të gjithë qytetarët, që nëse vërejnë parregullsi dhe shqetësime në ofrimin e shërbimeve të caktuara, e në veçanti në markete, dyqane e barnatore, dhe rritje enorme të çmimeve apo të mos zbatimit të orarit të punës, të njoftojnë inspektorët komunal, në këtë numër të telefonit: 045 976 049.