Deputeti nga ‘Nisma’ për Kosovën, Zafir Berisha, thotë për gazetën, “Kosova Sot” se faktet po tregojnë se kapja e shtetit nuk e ka kursyer as sektorin e drejtësisë, prokurorinë dhe gjyqësinë.
Ai më tej ka nënvizuar se vetë fakti se në përgjimet e fundit lëshohen edhe emrat e njerëzve që janë në prokurori është një dëshmi e qartë se kasta aktuale e drejtësisë nuk mund të bëjë diçka të madhe dhe të pritshme në drejtim të luftës kundër krimit të organizuar dhe korrupsionit e që kryesisht lidhen emra të politikës që janë në institucione.
“Andaj, e vetmja gjë në këtë drejtim është ndryshimi rrënjësor edhe i rregullave rreth emërimeve të njerëzve edhe natyrisht pensionimi i parakohshëm i një numri të madh të cilët i kanë shërbyer disa sistemeve edhe atij të ish regjimit, dhe më pastaj të ju lihet hapësirë kuadrove të reja të cilët kanë guximin por edhe vendosmërinë, që të punojnë për shtetin dhe njëkohësisht për ta luftuar krimin e organizuar dhe korrupsionin”, ka deklaruar Deputeti Zafir Berisha