Deri më tani nuk është regjistruar asnjë rast i infektimit me ethe hemorragjike (EHKK), ndërsa edhe numri i rasteve te pickimeve nga rriqrat është në rënie, në raport me vitet e kaluara. Kështu është bërë e ditur në mbledhjen e rregullt të Këshillit të Drejtorëve, e cila është udhëhequr nga kryetari i Komunës së Malishevës, Ragip Begaj.
Drejtori i Drejtorisë për Shëndetësi dhe Mirëqenie Sociale, Hajdin Berisha, duke raportuar në mbledhjen e sotme, tha se “pothuajse kanë përfunduar së realizuari të gjitha masat mbrojtëse në raport me luftimin dhe parandalimin e EHKK dhe aktualisht është duke u realizuar vetëm edhe faza e katërt e repelimit të kafshëve”. Më pas drejtori Berisha, konfirmoi se nuk ka asnjë rast të regjistrua me ethe hemorragjike, ndërsa edhe numri i rasteve të thumbimeve nga rriqrat, është në rënie.
Gjatë raportimeve të tyre, përgjegjësit e drejtorive komunale, bënë të ditur se janë duke vazhduar me realizimin e planifikimeve të tyre, si dhe janë duke u realizuara të gjitha projektet e kontraktuara dhe sipas planifikimeve.
Në këtë mbledhje, drejtori i Drejtorisë për Mbrojtje dhe Shpëtim, Sejdi Paçarizi, ka bërë të ditur se janë përgatitur për mbajtjen e ushtrimit fushor “Mirusha 2017”, që do të mbahet më 11 dhe 12 korrik (të martën dhe të mërkurën e kësaj jave). Drejtori Paçarizi, gjithashtu ka bërë të ditur se gjatë natës së mbrëmshme, për shkak të erërave të fuqishme, janë shkaktuar disa dëme në kulme të shtëpive dhe dëme tjera, kryesisht ne fshatin Carrallukë dhe për këtë qëllim ekipet vlerësuese kanë dalë në terren për verifikimin e dëmeve.