Pas heqjes dorë nga pretendimet për kreun e Kuvendit, blloku paszgjedhor e ka zgjidhur një fije të nyjës politike, ka thënë analisti Artan Muhaxhiri.
Ai vlerëson se pretendimet e bllokut për këtë pozitë ishin joligjore. Sipas tij, tashti është radha e PDK-së të reflektojë në realitetin e ri politik të krijuar, raporton KTV.
Edhe Dren Doli, nga Grupi për Studime Politiko-Juridike, pohon se tashmë nuk ekziston asnjë mundësi që pengon konstituimin e Kuvendit. Doli thotë se pas zgjedhjes së kryetarit të Kuvendit, është legjitime që Partia Demokratike e Kosovës, si parti me më së shumti vota të fituara në zgjedhje, t’u bëjë ftesë partnerëve të tjerë në Kuvendin e Kosovës dhe të kërkojë që të bëjnë koalicionin qeverisës me të.
Partitë e bllokut po e akuzojnë edhe presidenten e vendit, e cila nuk ka ftuar asnjëherë kryesuesen e seancës konstituive, Flora Brovina, që ta thërriste vazhdimin e seancës.
Deputetja e Vetëvendosjes, Albulena Haxhiu, thotë se deri tashti nuk e kanë parë presidenten që të ketë bërë diçka për ta zgjidhur ngërçin, por vetëm ka ftuar liderët në takime, por pa dhënë asnjë alternativë, transmeton Koha.net.
Njohësit e çështjeve politike kanë theksuar se nuk ekzistojnë mundësi ligjore për të shkuar në zgjedhje të jashtëzakonshme për aq kohë sa Kuvendi i Kosovës nuk vendos me votë që të organizojë vendi në zgjedhje apo të shpërndajë vetveten. /KTV/