Pas tribunës ndaj Portos, në ndeshjen e vlefshme për Ligën e Kampionëve, duket se Leonardo Bonuçi dhe trajneri Allegri kanë bërë paqe me njëri-tjetrin.
“Pas sqarimit me trajnerin, gjërat tani shkojnë më mirë se më përpara”, u shpreh mbrojtësi italian.
Bonuçi pranoi se dënimi i tij ishte i drejtë dhe se shërbeu për të përforcuar edhe më shumë marrëdhëniet mes grupit, brenda dhomave të zhveshjes.
Mbrojtësi i Juventus dhe kombëtares italiane, për shkak të performancave të një niveli të lartë, ka përfunduar qendër të zërave të merkatos.
“E ardhmja ime varet nga klubi. Unë kam një kontratë që më mban të lidhur me Juventus, deri në vitin 2021”, tha Bonuçi, duke lënë klubin të vendosë për të.
Mbrojtësi u pyet edhe për një transferim të Allegrit në Premiere League gjatë merkatos së verës, por ai u përgjigj menjëherë, duke thënë: “Nuk e di. Nuk janë gjëra që më përkasin mua”.