Bordi i ri i Asociacionit të Gazetarëve të Kosovës (AGK), ka zhvilluar të martën takimin e parë të punës, pas Kuvendit të mbajtur më 26 maj.
Në takimin e mbajtur në Prishtinë, anëtarët e bordit kanë diskutuar për gjendjen në të cilën gjendet Asociacioni i Gazetarëve të Kosovës dhe për hapat e mëtejmë të funksionalizimit të AGK-së.
“Bordi i ka bërë thirrje ish-kryetares së Asociacionit, Liridona Lluka, që t`i dorëzojë të gjitha dokumentacionet dhe asetet e asociacionit të cilat janë pronë e organizatës dhe do të duhej të ishin në funksion të bordit të ri”, thuhet në një kumtesë të Asociacionit.
Bordi i ri ende nuk ka pranuar asnjë dokumentacion zyrtar dhe asnjë raport për punën e realizuar në të kaluarën nga ish-udhëheqja e AGPK-së, tani AGK.
“Të gjithë anëtarët e bordit të AGK-së mbeten të përkushtuar në funksionalizimin sa më të shpejtë të Asociacionit të Gazetarëve të Kosovës”. /PrizrenPress.com/