Edhe një javë ka kohë Qeveria e Kosovës, për të plotësuar kërkesat e sindikatave në vend. Në të kundërtën , ato do të thërrasin grevë.
Ky është afati që iu dha sot ekzekutivit të vendit nga Bashkimi i Sindikatave të Pavarura të Kosovës (BSPK).
Kjo e fundit, para disa ditëve, thirri porotestë të sindikatave që veprojnë në ombrellën e saj, duke i dhënë afat Qeverisë, datën 20 prill, për plotësimin e kërkesave.
Ndërkohë, sot është mbajtur takimi mes drejtuesve të BSPK-së dhe Kryeministrit Albin Kurti, ku është diskutuar për mundësinë e realizimit të kërkesave të SBASHK-ut.
“Në takim ka qenë edhe Kryeministri Kurti, i cili ka premtuar që deri javën e ardhshme do të diskutohen mundësitë për shqyrtimin e realizimit të kërkesave te tyre”, tha Atdhe Hykolli, kryetar i BSPK-së. Ai u shpreh se Qeveria u ka dhënë sinjale pozitive për dialog rreth kërkesave që kanë sindikalistët.
“Nëse këto kërkesa nuk realizohen, do të kemi fillimisht grevë me nga një orë në ditë, e pastaj do t’i shqyrtojmë edhe format e tjera te kundërshtimit” , tha Hykolli për RTK-në. Prandaj, Hykolli luti Qeverinë që t’i marrë parasysh kërkesat e tyre.
Bashkimi i Sindikatave të Pavarura të Kosovës ka njoftuar se do t’i shtyjë veprimet sindikale deri në takimin e ardhshëm të kryesisë ekzekutive të BSPK-së që do të mbahet më 28 prill. Nga ana tjetër, Qeveria ende nuk ka dhënë ndonjë qëndrim zyrtar për këtë takim.