Anëtarët e Kuvendit të Prizrenit nga grupi multietnik i njohur me emrin “Pro evropian”, që përbehet nga këshilltarët e NDS-it, KTAP-së dhe Partia e Drejtësisë, sot e kanë braktisur seancën e organit më të lartë legjislativ në Prizren.
Sipas shefit të këtij grupimi politik në Kuvendin e Prizrenit, Oruç Karadollam, një gjë e tillë është bërë për shkak të mosmarrëveshjeve me partnerin qeverisës me Prizrenin , Partinë Demokratike të Kosovës, që ka të bëjë me përzgjedhjen e lokacionit të Qendrës Kulturore Boshnjake.
“Grupi ynë i kuvendarëve ‘Pro evropian’ numëron 6. anëtarë,dhe me largimin nga seanca e sotme shprehim mospajtimet tona , pasi që nuk jemi të kënaqur me marrëveshjen për koalicion me PDK-në”.
“ Kupa është mbushur pasi që 5 herë është ndryshuar lokacioni për Qendrën Kulturore Boshnjake, dhe për këtë çështje ne nuk jemi dakorduar, dhe kjo është arsyeja që ne nuk do të marrim pjesë në mbledhjet e Kuvendit”, tha ai.
Shefi i “Pro evropianëve”, Karadollam, nuk e përjashton edhe mundësinë e largimit nga koalicioni, pas këtyre mosmarrëveshjeve , që janë bërë temë mediale ditëve të fundit.
“ Nuk deshirojmë që aq lehtë të braktisim koalicionin, por një gjë të tillë nuk e përjashtojmë. Ditëve në vijim ne do të marrim vendime rreth hapave të mëtejmë rreth kësaj çështje, dhe do të njoftojmë opinionin e gjërë me kohë”, theksoi ai. /TVPZ/