Banorët ankohen në Komunën e Prizrenit,duan Shtëpinë e Kulturës dhe Ambulancën
Banorët vullnetarisht kanë ndërtuar xhaminë e tash edhe familja e Luz Thaçit shpreson se do të ndërtojë kishën e këtij fshati. Tashmë vendi është ndarë dhe pritet të merren edhe lejet përkatëse.
Rruga e asfaltuar që lidh fshatin Caparc me rrugën regjionale, disa kilometra infrastrukturë nëntokësore, shkolla e ndërtuar, i japin atributet e një vendbanimi modern fshatit Caparc Komunës së Prizrenit.
Mirëpo, Xhavit Thaçi, banor i fshatit, pohon se kjo rrugë është dashur të vazhdojë edhe për lagjen e poshtme, që lidhet me fshatin Novakë. Ankesa më të mëdha, si ajo për mungesë kanalizimi dhe mungesë të asfaltit ka shprehur edhe banori Ahmet Shala. Hasan Hasani, drejtor i Shërbimeve Publike në Komunën e Prizrenit, shprehet se për shkaqe të natyrave të tjera ka mbetur kanalizimi i papërfunduar.
“Brenda muajit maj ai kanalizim atje do të përfundojë. Tashmë drejtoria ka zotuar jo më pak se 81 mijë euro për atë kanalizim. Kurse sa i përket shtrimit të asfaltit, tashmë e kemi përuruar urën në vlerë 40 mijë euro e domosdo se edhe asfaltimin deri tek ajo urë do ta bëjmë për ta lidhur fshatin Caparc me atë Novakë”, ka thënë Hasani/kosova sot/