Deri në dhjetë mijë euro mund të dënohen deputetët, të cilët kërkuan votat e qytetarëve me mesazhe telefonike gjatë zgjedhjeve, duke shfrytëzuar të dhënat personale të qytetarëve, raporton KTV.
Kryeshefi i Agjencisë për Mbrojtjen e të dhënave personale, Ruzhdi Jashari, i cili ka raportuar sot para Komisionit Parlamentar për Siguri, ka bërë të ditur se kjo çështje tashmë është proceduar dhe pritet vetëm vendimi final.
Ndërkohë, kryetari i komisionit, Daut Haradinaj, e ka pyetur Jasharin nëse Ligji për Përgjimet bie në kundërshtim me misionin e Agjencisë që ai udhëheq.
Por, Jashari nuk ishte i prerë, duke thënë se qytetarët me ligj kanë të drejta në mbrojtjen e të dhënave të tyre, por për mënyrën e përgjimit varet nga gjykatat, prokuroritë, policia apo posta.
Agjencia ka bërë të ditur se ka fituar një proces gjyqësor me KEK-un, pasi ekspozoi të dhënat personale të konsumatorëve, me faktin e dërgimit të faturave të hapura.