Në Zagreb të Kroacisë fillon sot, më 19 nëntor, shfaqja e filmave më të fundit të rajonit përpara përzgjedhësve të Berlinales. Kjo ngjarje do të zgjas për tri ditë dhe prodhimet më të reja filmike do të shfaqen duke synuar pjesëmarrjen në edicionin e 66-të të Berlin International Film Festival, i cili është një nga festivalet më të mëdha në botë.
Këtë vit bashkë me filmat nga rajoni do të shfaqen edhe 10 filma kosovarë. Filmat e metrazhit të gjatë që do të prezantohen në Zagreb janë: “Home Sweet Home” me skenar nga Zymber Kelmendi dhe regji nga Faton Bajraktari, “Eho e Heshtur” me skenar dhe regji nga Dren Zherka dhe ”Engjujt janë larg” me skenar dhe regji nga Gjergj Xhuvani. Ndërsa filmat e shkurtër që do të shfaqen janë “Fjala” me skenar nga Besian Hysaj dhe regji nga Ujkan Hysaj, “Treni” me skenar nga Selmon Beha dhe Jeton Rushiti dhe regji nga Selmon Beha, “Personazhi I” me skenar dhe regji nga Naim Berisha si dhe “Anestezion” me skenar dhe regji nga Noar Sahiti.
Në Zagreb do të shfaqen gjithashtu edhe tre filma kosovarë të animuar, “Alone” nga Jeton Lakna, “Ncuk, Ncuk, Ncuk” nga Visar Arifaj dhe “Përtej” nga Nexhat Krasniqi. /KosovaLive