Përgjegjësit e monumenteve të historisë shqiptare në Prizren kanë pasur goxha punë në Ditën e Flamurit. Sipas tyre, të mërkurën, është shtuar numri i vizitorëve nga të gjitha trevat shqiptare.
E këta vizitorë kanë pasur mundësinë që të shohin edhe risi në qytetin e Lidhjes, duke filluar nga kompozicioni i shtatores së tre liderëve të Lidhjes Shqiptare të Prizrenit, piktura e restauruar e Gjergj Kastriotit e vitit 1878 e deri te murali i vendosur në sheshin e Lidhjes me portretin e Skënderbeut. Të gjitha këto aktivitete janë realizuar në vitin jubilar të 550-vjetorit të kalimit në amshim të Gjergj Kastriotit-Skënderbeut.
“Prizreni pret e përcjell vizitorë të shumtë nga të gjithë hapësirat shqiptare në kuadër të shënimit të festës kombëtare”, ka thënë Parim Kosova, përgjegjës i Kompleksit Muzeor të Lidhjes Shqiptare të Prizrenit.
Jo të paktë kanë qenë edhe vizitorët nga Shqipëria që të mërkurën ka festuar 106-vjetorin e shpalljes së pavarësisë.
Në Sheshin e Lidhjes, në Prizren, të mërkurën është vendosur murali me portretin e heroit kombëtar, Gjergj Kastrioti-Skënderbeu. Murali është punuar nga artisti, Besart Gashi.
Piktura e restauruar e heroit kombëtar, e cila gjendet brenda Katedrales Zonja Ndihmëtare në Prizren, është zbuluar në një akademi solemne të organizuar nga Ipeshkvia Prizren-Prishtinë, të martën mbrëma