Dita e 3-të e muajit dhjetor 2015 shënon saktësisht 2 vjetorin e hapjes së kinemasë së qytetit të Prizrenit, Dokukinos.
DokuKino, një kinema me teknologjinë 3D dhe me rreth 160 ulëse, që është funksionale përgjatë gjithë vitit, është kinemaja e parë pas 15 viteve në Prizren.
Gjatë këtyre 2 viteve të fundit kjo kinema i ka kaluar 2 edicione të Dokufestit dhe ka shfaqur shumë filma të njohur Hollivudian si: Terminator, Fast & Furious, Jurassic Park, Transformers etj. Programi i Dokukinos, përveç filmave hollivudian dhe më të ri përfshinë edhe filmat më të suksesshëm dokumentar të shfaqur në DokuFest si dhe filma të pavarur si: 20.000 Days On Earth dhe Amy.
Përveç shfaqjes së filmave Dokukino ka edhe klubin e filmit ku të gjithë fëmijët dhe të rinjtë mund të anëtarësohen dhe të bëhen pjesë e aktiviteteve lidhur me filmin, apo edhe të punojnë si vullnetarë për kinemanë e qytetit. Dokukino bashkë me Dokufestin janë poashtu pjesë e projekteve si EFA Young Audience Award dhe DokuVision, ku përfshihet shfaqja e filmave dhe diskutimi rreth tyre.
Menaxherja e kinemasë Zana Arapi u shpreh shumë e kënaqur me rritjen e numrit të publikut në kinemanë e qytetit çdo ditë e më tepër.
“Ndihem shumë krenare që jam pjesë e një institucioni kuturor që mund t’ju sjellë kënqësi qoftë edhe për një orë shikuesve tanë. I falenderoj të gjithë shikuesit e DokuKinos dhe i ftoj që të jenë pjesë e kinemasë edhe në të ardhmen” – tha ajo.
Në fillim të muajit dhjetor në Dokukino shfaqet filmi i regjisorit Stiven Spielberg, Bridge of Spies, si dhe më 17 dhjetor pritet të mbahet pjesa e shtatë e serisë legjendare Star Wars: The Force Awakens në formatin 3D! /PrizrenPress.com