Shkolla fillore “Abdyl Frashëri” në Prizren ka gati një vit që udhëhiqet nga dy drejtorë.
Zyra e auditorit në këtë komunë ka gjetur se në listën e pagave, për këtë shkollë, figurojnë dy drejtorë.
Alidin Flugaj është drejtori i kësaj shkolle për paralelet 0-5, ndërkaq Maxhun Krasniqi udhëheq këtë shkollë me klasat 6-9.
Maxhun Krasniqi, njëri nga dy drejtorët e kësaj shkolle, thotë se kjo ndarje është bërë me kërkesë të tyre, për shkak të numrit të madh të nxënësve.
Në Drejtorinë e Arsimit në Komunën e Prizrenit, thonë se kjo ndarje ka ndodhur në harmoni me udhëzimin administrativ dhe në bashkëpunim me MASHT-in, por që ka pasur disa gabime teknike.
Në dokumentet që i ka siguruar Kohavisioni, për shkollën “Abdyl Frashëri” fillimisht është kërkuar që të themelohet një shkollë e re, por Drejtoria e Arsimit nuk ka lejuar që kjo të ndodhë.
Sipas Gani Gërmizajt, drejtor i Arsimit në Prizren ndarja e tillë e shkollës në dy nivele ka sjellë cilësi më të mirë të mësimit.
Por, një vendim i tillë po kritikohet ashpër nga opozita në Prizren.
Sipas zyrtarëve të komunës, kur të ketë buxhet të mjaftueshëm, këto shkolla do të ndahen dhe do të funksionojnë të ndara./KTV/