Ekipi i filmit “Shok” që e dërgoi Kosovën për herë të parë në “Oscar” vizitoi fëmijët me aftësi të kufizuara në Qendrën e Kujdesit Ditor PEMA në Prizren.
Ekipi “Shok” u njoftuan me aktivitetet e ofruara në kuadër të PEMA si dhe patën mundësinë të kalojnë kohë dhe të flasim me fëmijët me aftësi të kufizuara.
Producenti Eshref Durmishi dhe skenaristi dhe regjisori i filmit “Shok” Jamie Donoughue, bashk me aktorët Lum Veseli dhe Andi Bajgora treguan gatishmërinë e tyre për promovimin e të drejtave të fëmijëve me aftësi të kufizuara, të drejtën për shërbime dhe edukim cilësor. Producenti Eshref Durmishi theksoi “se jemi të gatshëm të ndihmojmë për të gjetur mënyra për mbështetjen e fëmijëve me aftësi të kufizuara, realizimin e të drejtave të tyre për një mirëqenie më të mirë”.
Drejtoresha ekzekutive e Qendrës së Kujdesit Ditor PEMA, Liridona Zogaj theksoi rëndësinë e shtrirjes së qendrave të kujdesit ditor edhe në komunat e tjera. “Ngritja e qendrave te kujdesit ditor është një nevojë themelore për rehabilitimin dhe riintegrimin e fëmijëve me aftësi të kufizuara duke minimizuar stigimën që lidhet me aftësinë e kufizuar dhe duke fuqizuar potencialet e tyre për një gjithëpërfshirje aktive në shoqëri”, potencoi znj. Zogaj.
PEMA është organizatë jo-qeveritare e cila ofron shërbime psikosociale me qëllim krijimin e një mjedisi sa më mbështetës për fëmijët me aftësi të kufizuara dhe të cenueshëm. Organizata vepron përmes katër qendrave të kujdesit ditor në katër qytete të Kosovës (Ferizaj, Gjilan, Pejë dhe Prizren).