Ish-Nënkryetari i Parë i LDK-së, Eqrem Kryeziu e ka cilësuar si mashtrim simpatik të Presidentes angazhimin e tre ekspertëve ndërkombëtarë, të cilët konstatuan se shënimi i vijës kufitare me Malin e Zi ishte bërë në mënyrë të rregullt.
“E vetmja gjë simpatike në këtë rast do të ishte mburrja eventuale, por e ligjshme domosdo, e zonjës Jahjaga dhe, për pasojë, e secilit prej nesh se edhe Kosova u dha punë tre gastarbeiter-ëve”, ka shkruar Kryeziu.
Sipas Kryeziut, tre ekspertët s’kishin kurrfarë kredencialesh as në shtetet e tyre dhe kjo i ka shmangur nga çfarëdo përgjegjësie e llogaridhënie.
“Sipas opinionit tonë, Komisioni Ndërkombëtar për Demarkacionin ishte një mashtrim simpatik: duke mos pasur kredenciale të shteteve të tyre dhe as të ndonjë institucioni të besueshëm ndërkombëtar, në këtë mënyrë ata i shmangen çdo përgjegjësie e llogaridhënie”, ka shtuar ai.
Emërtimi gastarbajter i referohet punëtorëve sezonalë dhe atyre që shkojnë prej një vendi në vendin tjetër për punë.
Presidenca e Kosovës nuk ka sqaruar ende se sa para u janë dhënë tre ekspertëvendërkombëtarë, por sipas burimeve të Express, Shteti i kanë kushtuar më shumë se 50 mijë euro pagesa për punën dy javore të amerikanit Fletcher M. Burton, gjermanit Herbert Wilmes dhe britaniku Fred Newton.