Edhe pse Presheva dhe Bujanoci kanë aktorë të shumtë, nuk kanë teatër, në Luginë ka kohë që nuk është xhiruar as edhe një film i metrazhit të shkurtë.
Në një intervistë për Rrokum TV, regjisori preshevar, Kastriot Saqipi – Kaqa, ka thënë se janë në përgatitje e sipër që për herë të parë në Luginë të xhirohet edhe një film me metrazh të gjatë.
“Në Luginë të Preshevës duam që të startojmë me një film të metrazhit të gjatë, jemi duke punuar, duke përgatitur skenarin, ku producenti Gani Veseli po bën përgatitjet e duhura që të fillojmë punën në Preshevë. Dhashtë Zoti t’ia arrijmë qëllimit, duke shpresuar që në pranverë të bëhemi gati dhe të fillojmë”, ka thënë Kaqa për Rrrokum TV.
Në pyetjen e gazetares, se sa është e zhvilluar kultura në Preshevë, ai ka thënë se gjithçka është mangu në Preshevë, duke paralajmëruar që në një të ardhme të afërt, falë bashkëpunimit me aktorët nga Kosova e Maqedonia, në Luginë të ketë sa më shumë shfaqje dhe filma të ndryshëm. /presheva.com/