Kryesuesja e seancës konstituive, Flora Brovina, ka konfirmuar se seanca e radhës do të mbahet të enjten e javës së ardhshme, përkatësisht më 2 tetor.
Në një prononcim për Gazetën Express, Brovina ka thënë se është duke u përgatitur seanca dhe me kohë do t’iu dërgohen ftesat deputetëve.
“Përgatitjet për thirrjen e seancës kanë filluar dhe gjatë javës së ardhshme do mbahet seanca. Besoj, se të enjten e javës së ardhshme do të kemi seancën e radhës”, ka thënë Brovina.
Ajo ka thënë se beson se në seancën e radhës do të konstituohet Kuvendi i Kosovës për t’i hapur rrugë pastaj formimit të Qeverisë.
“Në seancë shkojmë më të përgatitur dhe besoj se do të konstituohet Kuvendi”, ka shtuar ajo.
Seanca e fundit dështoi pasi PDK nuk arriti të zgjedhë Arsim Bajramin kryeparlamentar.
Pas kësaj, Brovina kishte ndërprerë seancën, ndërsa vazhdimisht është kërcënuar nga LDK, AAK, NISMA dhe VV se do ta thërrasin vetë seancën nëse këtë nuk e bën kryesuesja.