Forca e Sigurisë së Kosovës, javën e ardhshme, do të bëhet ushtri nëpërmjet Ligjit të ri. Aty parashihet që Misioni i FSK’së të jetë mbrojtja e sovranitetit dhe integritetit territorial të Republikës. Po, ashtu, FSK nuk do të ndërrojë emrin dhe do të merret edhe me mbrojtjen e qytetarëve, mbrojtjen e pronës dhe interesave të Shtetit. Do të armatoset në përputhje me nevojat e FSK’së. Projektligji është hartuar nga Presidenca në bashkëpunim me Ministrinë e FSK’së.
Përkundër komplikimeve ndërkombëtare, ndryshimin e misionit të FSK’së, pritet ta përkrahin vendet kryesore të NATO’s.
Sidoqoftë, me Projektligjin e ri, nuk parashihet t’i ndërrohet emri FSK’së, por vetëm misioni. Nga një organizatë që kishte për qëllim reagimin në raste të katastrofave natyrore, do të marrë rol në mbrojtjen e sovranitetit të Kosovës.
Sipas projektligjit, rekrutimi në FSK do të jetë vullnetar.
“FSK do të jetë e pajisur me armatim adekuat, në përputhje me nevojat e FSK’së, për kryerjen e misionit dhe detyrave të saj”, thuhet në Nenin 6 të Projektligjit të FSK’së.
Ky projektligj është hartuar nga Presidenca në bashkëpunim me Ministrinë e Forcës së Sigurisë së Kosovës.
Express ka siguruar Projektligjin e ri i cili do të dalë për miratim në Parlament javën e ardhshme.