Me mund të madh, më 3 gusht të vitit të kaluar, deputetët ia dolën të miratojnë ndryshimet kushtetuese që i hapën rrugë themelimit të Gjykatës Speciale.
E derisa krijimi i kësaj Gjykate u quajt i dëmshëm për vendin, vetë Kushtetuta, përmes pikës 6 të nenit 84, ia njeh Presidentit të drejtën për me e kthye, së paku një herë në Kuvend çdo ligj.
Presidenti i Republikës ka të drejtën e kthimit për rishqyrtim të ligjeve të miratuara, nëse konsideron se janë të dëmshme për interesat legjitime të Republikës së Kosovës, ose të një a më shumë komuniteteve të saj. Të drejtën e rikthimit të një ligji mund ta shfrytëzojë vetëm një herë – thotë neni 84/6 i Kushtetutës së vendit.
Mirëpo, ligji për Specialen, është i pamundur të kthehet në rishqyrtim nga Presidentja, jo vetëm për shkak të kalimit të afateve kohore, po sepse vetë Presidentja e ka dekretuar atë pas konsultimeve me Gjykatën Kushtetuese, raporton TV Rrokum.
E këtë të drejtë nuk do ta ketë as Presidenti i ardhshëm i vendit, Hashim Thaçi, edhe pse emri i tij citohet në raportin e Dick Marty’t, mbi të cilin po themelohet Gjykata Speciale.
Sipas avokatit Tomë Gashi, mundësitë juridike për këto ndryshime nuk janë shterë të gjitha. Ai rreshton disa prej tyre, ku Ligji për Gjykatën Speciale mund të ndryshohet pjesërisht.
Për Gashin nuk ka “potencialisht të akuzuar, por “sigurisht të akuzuar”, sepse sipas tij, BE-ja nuk do të kishte investuar 400 milionë euro për një projekt pa të akuzuar.
Avokati përsëriti se gjatë kohës së paraburgimit në Hagë, të akuzuarit kurrsesi nuk mund të ushtrojnë ndonjë profesion në Kosovë.