(E plotësuar) Kryetari i AAK-së, Ramush Haradinaj ka thënë se ka bërë shumë për ndryshimin e rrethanave politike në vend. Ai thotë se ka qëndruar me vendosmëri kujdestar për shumicën LVAN.
Sa i përket kryeministrit të ri, Isa Mustafa, Haradinaj ka thënë se nuk beson në punën e tij. Kjo, sipas tij, jo për shkak të personit, por për shkak të mënyrës së qeverisjes.
Ai në emisionin “Debat” të RTK-së ka thënë se sikur qeverisjen e vendit ta merrte LVAN-i, do të ishte më mirë.
“Populli me një gjendje të tillë, si shtet i ri, me një kryeministër si Mustafa nuk do të funksionojë”, u shpreh ai.
“Qëllimi ka qenë vërtetë në ndryshim, veprime të guximshme, dinamika të ndryshme. Kam pasur ndërmend ta marr ndihmën e këshillën e secilit, qoftë vendor apo ndërkombëtar”, shpalosi Haradinaj.
Ai nuk deshi të komentojë për fjalët e atyre që e bënë bashkë koalicionin LVAN, por siguroi se aty ku ai thotë ‘po’, e mban fjalën.
“Kam sakrifikuar çdo gjë për ndryshim. Gjithmonë kom kujdestaruar për shumicën 63”.
I pyetur se a e ka uruar Isa Mustafën për postin e kryeministrit, Haradinaj e ka mohuar një gjë të tillë.
“Jo, nuk kam menduar se është detyrë e imja”, ka thënë ai.
Si parti opozitare, ai tha se do t’i kryejnë detyrat e shtëpisë e do ta detyrojnë qeverinë të japë llogari për çdo veprim.
Haradinaj: Shkelësit e ligjit nuk do të kenë vend në AAK
Kryetari i AAK’së, Ramush Haradinaj, ka ripërsëritur se partia e tij do të “pastrohet nga të gjithë personat me veprimtari të dyshimtë”.
Në emisionin “Debat” të RTK’së, Haradinaj ka thënë se “kriminelët nuk do të mund të veprojnë brenda AAK’së e as në emër të saj”.
“Është një moment i duhur dhe i domosdoshëm që AAK të shkojë me reformë dhe nëse shkon, të nxjerrë parime se çka pret. Nuk presim që dikush që është i përfshirë në aktivitete të tilla, që është shkelës i ligjit, të gjejë hapësirë në AAK. Po shkojmë në zgjedhje me disa obligime”, ka thënë Haradinaj.
Ai ka thënë se AAK nuk pret që nga këto zgjedhje, në asnjë variant që shkelësit e ligjit të jenë pjesë e Aleancës.
Ai ka thënë se ky do të jetë një mesazh i qartë për vetë AAK’në.
“Nuk guxon në strukturën e AAK’së me u zgjedhë askush që është shkelës i ligjit”.