Anëtari i Kryesisë së Nismës për Kosovën, Bajram Hasani, ka thënë se gazi lotsjellës nuk është armë, por mjet i cili shërben për të pamundësuar mbajtjen e seancave të Kuvendit të Kosovës.
Hasani në emisionin “Kontakt” në Tribuna Channel, ka thënë se Kosova nuk mund të quhet një shtet demokratik për faktin se po bëhet shtypje e opozitës dhe po arrestohen deputetët.
Sipas tij, asnjë shtet ligjor nuk i bën këto veprime.
Hasani ka shtuar se sikur opozita mos të kishte reaguar për tërheqjen e dy marrëveshjeve, atë për Asociacionin dhe demarkacionin me Malin e Zi, këto marrëveshje do të vazhdonin të ecnin tutje.
Ai ka thënë se opozita nuk i beson Gjykatës Kushtetuese sepse, sipas tij, sikur Kushtetuesja ashtu edhe Policia e Kosovës kanë humbur kredibilitetin.
Anëtari i kryesisë së Nismës për Kosovën ka thënë se pushtetarët e ftojnë opozitën për bisedime vetëm sa për sy e faqe, por marrëveshjet nuk i heqin.
“Ata thonë hajde ulemi mirëpo ne nuk i tërheqin nënshkrimet”, ka deklaruar Hasani.