Policia e Kosovës ka përfillur rekomandimin e Inspektoratit të PK-së lidhur me suspendimin e komandantit për Rajonin e Prizrenit, Nexhmi Krasniqi.
Zëdhënësi i këtij institucioni, Daut Hoxha ka konfirmuar për “Zërin” se Policia ka vepruar konform rekomandimeve të Inspektoriatit.
“Po, ne kemi vepruar konform rekomandimeve IPK-së dhe kemi implementuar duke pas ligjet e aplikueshme”, ka thënë ai.
Ndryshe, Inspektorati Policor i Kosovës, pasi ka pranuar disa informacione dhe ankesa nga qytetarët, si dhe pas ndërmarrjes së disa veprimeve hetimore preliminare, i ka rekomanduar dje Policisë së Kosovës suspendimin e dy zyrtarëve të PK-së (njëri nga ta me pozitë të Drejtorit Rajonal të PK-së në Prizren kurse tjetri udhëheqës në sektorin e hetimeve të vrasjes në të njëjtën Drejtori Rajonale).
Përmes një njoftimi për media të dërguar nga IPK, thuhet se rekomandimi për suspendim deri në njoftimin tjetër bazohet në Ligjin për Inspektoratin Policor të Kosovës, neni 17 – paragrafi 12.
“IPK asnjëherë nuk paragjykon vendimin final të organeve të drejtësisë (bazuar në parimin e prezumimit të pafajësisë). Inspektorati Policor garanton qytetarët e vendit se çdo herë do të angazhohet për mbrojtjen e lirive dhe të drejtave të qytetarëve por edhe ruajtjes me vendosmëri të kredibilitetit të Policisë së Kosovës”, theksohet në njoftim.