Të dhënat e policisë se vrasja e Hekuran Morinës mbrëmë në Prizren dhe plagosja e vëllait të tij Fadilit ka ndodhur për shkak të zhvatjes del të jetë i vërtet.
Këtë për “Zërin” e ka konfirmuar edhe kushëriri i viktimës, Emin Morina. Sipas tij grupi i cili dyshohet për vrasjen e Hekuranit, i kanë kërkuar një shumë prej 70 mijë eurosh, të cilat sipas tyre ua kishte pasur borxh babai i ndjerë i viktimës.
“Konflikti në mes të viktimës dhe vrasësit ka filluar menjëherë pas vitit të ri, 2 muaj pasi që kishte ndërruar jetë babai i viktimës (Hekuranit). Me këtë rast grupi i cili dyshohet për vrasjen e Hekuranit, i kishte kërkuar atij një shumë të hollash prej 70 mijë eurosh me arsyetimin se këtë borxh ua kishte babai i tyre që kishte ndërruar jetë”, rrëfen Emin Morina.
Ai thotë se me këtë rast familja edhe pse nuk e kishte pranuar dokumentin të cilin grupi i dyshuar për vrasjen ua kishte prezantuar, rastin e kishin raportuar në polici për të shikuar vërtetësinë e dokumentit.
“Ekspertiza e policisë ka treguar se dokumenti të cilin grupi e kishin prezantuar ishte i këtij viti dhe jo i një viti më herët siç pretendonin grupi i dyshuar për vrasje. Pra ishte fals”, rrëfen ai.
Në ndërkohë njëri nga të dyshuarit për vrasjen e Hekuranit, Bernard Plerazri ishte arrestuar nga policia mbi aktakuzën e “detyrimit”.
Por dy ditë pasi që ka dalë nga paraburgimi ai kishte reaguar dhe e ka kryer vrasjen e Hekuranit dhe ka plagosur vëllain e tij Fadilin.
Sipas kushëririt, Emin Morina gjendja e Fadilit është stabile tani dhe jashtë rrezikut për jetë. Ndërkohë ai njofton se familjarët e të dyshuarve për vrasje deri më tani as nuk i janë lajmëruar familjes së viktimës. /Zeri/