Ka rreth pesë muaj që Republika e Kosovës është pa Kuvend dhe pa institucione. Kjo për faktin se është krijuar një ngërç politik, apo bllokadë institucione nga partitë shqiptare.
E njëra prej arsyeve të këtij ngërçi politik është edhe aktvendimi i Gjykatës Kushtetuese që, sipas saj kryeparlamentarin ta propozojë ekskluzivisht Partia Demokratike e Kosovës, parti e cila assesi nuk mundet që t’i këtë numrat e mjaftueshëm për ta fituar këtë postë, e që me mjaft ngulm e kërkon. Por, edhe pse kaluan muaj të tërë, ky ngërç politik, vështirë që të tejkalohet.
Por, cila është zgjidhja e duhur e zgjedhjes së këtij problemi? Alternativa e vetme si duket janë zgjidhjet e jashtëzakonshme!
Analistët politik, vlerësojnë për gazetën “Bota sot” se, e vetmja zgjidhje e kësaj bllokade politike janë zgjedhjet e reja. Sipas tyre, krejt kjo bllokadë e shkaktuar është si rrjedhojë e Partisë Demokratike të Kosovës, dhe kryetarit të Gjykatës Kushtetuese, Enver Hasanit. Por, zgjidhja e këtij problemi është e paimagjinueshme edhe për Lidhjen Demokratike të Kosovës.