Kosova do të humbë shansin për anëtarësim të shpejtë në Bashkimin Evropian, por do të ketë edhe një sërë dëmesh të tjera, nëse nuk do të votojë në Kuvendin e saj formimin e Gjykatës Speciale, është thënë të martën, gjatë një tryeze me titullin “A duhet Kuvendi I Kosovës që të votojë Gjykatën Speciale”, raporton KOHA Ditore.
Katër skenarët më të këqij që do të mund të ndodhin, në rast se Kosova nuk e voton Gjykatës Speciale, janë se: së pari mandati i Gjykatës Ndërkombëtare për Krimet e Luftës mund të vazhdohet; së dyti, raportet e SITF lidhur me krimet e kryera gjatë dhe pas luftës në Kosovë mund të referoheshin nga Këshilli I Sigurimit tek Gjykata Penale Ndërkombëtare; së treti, Këshilli i Sigurimit I KB-së do të përdorte Rezolutën 1244 si bazë për themelimin e një tribunali ndërkombëtar dhe një gjykatë e tillë do të mund të themelohej përmes koordinimit të Misionit të KB-së në Kosovë (UNIMIK) dhe BE-së, dhe në fund, Këshilli i Sigurimit I KB-së mund të përdorë kapitullin VII të kartës së KB për të krijuar një tribunal ndërkombëtar.
Shefi i Zyrës së BE-së në Kosovë, Samuel Zhbogar ka thënë se me krijimin e dhomave speciale të kësaj Gjykate, do të qartësoheshin shumë gjëra dhe shumë dilema në lidhje me supozimet për krimet e kryera në të kaluarën. Duke iu referuar Raportit të Dik Marty-it, ai ka thënë se “ka ardhur koha që këto akuza kaq të rënda, të zbardhen”.