KEDS-i ka reaguar pasi një ekip i kësaj kompanie është sulmuar dje në Prizren derisa po kryente detyrën.
Një nga punëtorët ka marrë lëndime trupore, është trajtuar në spital dhe po e vazhdon shërimin në shtëpi.
KEDS-i ka thënë se e dënon fuqishëm këtë veprim, përderisa si kompani pret nga organet e rendit dhe ata që bëjnë veprime të tilla të marrin dënimin e merituar.
“Rastet e tilla paraqesin pengesa të mëdha në kryerjen e detyrave për punëtorët tanë, që kanë mision furnizimin me energji elektrike të qytetarëve të vendit. Secili punëtor yni është i përkushtuar të kryejë detyrat e veta zyrtare, ndërsa presim nga të gjitha hallkat e shoqërisë që punëtorëve tanë t’ua lehtësojnë punën, pra të bashkëpunojnë për të gjitha çështjet që ndërlidhen me ta, kur dihet rëndësia jetike e furnizimit me energji elektrike për popullin, e sidomos ekonominë e Kosovës. Pra, KEDS-i kërkon nga secili konsumator që t’i kryejë detyrat dhe obligimet e veta, në mënyrë që të mos ndikohet sistemi, por ai të avancohet tutje si një e mirë e përbashkët. Kjo është rruga e vetme përmes së cilës mund të ecim përpara. Rastet e tilla paraqesin vetëm vështirësi, prandaj nuk guxojnë të përsëriten më”, thuhet në reagim.