Qeverisja e vendit, e veçmas qeverisja e këtyre 8 viteve të pasluftës, e dominuar nga PDKja dhe elitat politike të korruptuara e të inkriminuara, të cilat punuan vetëm për interesin e vet, por jo edhe të qytetarëve, e kanë lënë shtetin e ri të Kosovës një shtet tejet të prapambetur, ndër vendet më të pazhvilluara jo vetëm në rajon, por edhe më gjerë. Politikanë dhe analistë konsiderojnë se pa një ndryshim gjeneral substancial të elitave të tanishme politike nuk mund të ketë as ndryshim kualitativ në qeverisjen më të mirë të vendit dhe ngjalljen e perspektivës për qytetarët e Kosovës, në mënyrë që Kosova të shohë dritën e vet të perspektivës dhe të mos vuajë pasojat e establishmentit te korruptuar në të tri pushtetet.
” Një klasë politike e dobët në qëndrime, e pashkolluar, e lidhur me krimin e organizuar dhe e fokusuar vetëm në interesat personale, në zhvatje e plaçkitje të pafund të pasurisë së qytetarëve të Kosovës, që shet interesat e Kosovës në çdo hap, kjo është elita politike e Kosovës. Këtu nuk është asgjë e rastit. Një shtet si Kosova, që fle mbi pasuri përrallore, të cilat asnjë shtet në botë nuk i ka të koncentruara kaq shumë në një hapësirë kaq të vogël, jeton në varfëri të skajshme. Krejt kjo është pasojë e një elite politikisht injorante, që sheh vetëm interesat e saja dhe jo interesat e Kosovës”, tha deputeti i LDK-së, Adem Salihaj, politikan me përvojë në LDK, që nga themelimi i saj, shkruan gazeta Kosova Sot.
Degradimi i shtetit
Analisti politik Nexhmedin Spahiu konsideron se ndryshimi mund të vijë vetëm me një shkëputje të madhe, prerje të fortë nga establishmenti politik i kriminalizuar dhe dhënia e besimit për të qeverisur vendin nga njerëzit me CV të pastër e të pashantazhuar.
“Po, gjithsesi, ndryshimi mund të ndodhë. Mirëpo, për t’u arritur kjo nevojitet në radhë të parë që në pozita ballore të institucioneve të Kosovës të jenë njerëzit e duhur. Duhet të vendosen në majat e piramidës shtetërore persona të aftë dhe të ndershëm”, tha Spahiu për “Kosova Sot”.
Sido që të jetë, ai beson se një filtrim i tillë në establishmentin politik të Kosovës nuk mund të ndodhë derisa vazhdon ky nivel i mosbesimit qytetar, i mungesës së guximit për votë ndryshimi dhe abstinenca e madhe e qytetarëve në zgjedhje.
“Mendoj se klasa politike e Kosovës ka kohë që e ka humbur besimin e qytetarëve me vetë faktin se në zgjedhje asnjëherë pjesëmarrja nuk po e kalon kuotën 50%. Ky fakt edhe e ka bërë klasën politike më të papërgjegjshme”, tha Spahiu për “Kosova Sot”. Pa shpresë me këtë establishment politik e sheh të ardhmen e Kosovës edhe analisti Jeton Kelmendi, sipas të cilit klasa politike e Kosovës është devalvuar si e tërë që nga vdekja e presidentit historik Ibrahim Rugova dhe fillimi i rrënimit të imazhit dhe besimit edhe në LDK.
“Nga një vend që konsiderohej popull i urtë dhe liridashës, gjë që e pati krijuar një imazh të tillë presidenti Rugova, këta tjerët, duke përfshirë edhe shefat e partisë së Rugovës dhe me theks të veçantë Thaçi me sejmenët e vet, ia dolën që ta realizojnë këtë ndryshim dhe sot kemi një shtet ku qytetarët e tij nuk kanë të drejta as sa macet e vendeve të BE-së”, tha Kelmendi..