Kancelari i Gjermanisë, Olaf Scholz si edhe presidenti i Francës, Emanuel Macron, deklaruan të shtunën se kanë angazhuar këshilltarët e tyre, për të mbështetur dialogun për normalizimin e marrëdhënieve midis Kosovës dhe Serbisë. Këta dy këshilltarë, do të jenë në ikrah të emisarit të BE-së për dialogun, Miroslav Lajçak.
E angazhimin e dy shteteve të fuqishme të BE-së, e komentoi sot kryeministri i Kosovës, Albin Kurti.
Pas ceremonisë me rastin e 23 vjetorit të themelimit të Policisë së Kosovës, në një deklarim për media, kryeministri i vendit u shpreh se mirëpret interesimin e Gjermanisë dhe Francës, për të ndihmuar në procesin e dialogut për marrëveshjen që ka në qendër njohjen reciproke.
Ne e mbështesim faktin që dy shtete kaq të rëndësishme evropiane dhe njohëse të republikës sonë që nga fillimi, do të ndihmojnë ndërmjetësimin e Brukselit për një marrëveshje ligjërisht obligueshme, që e ka në qendër njohjen reciproke”, u shpreh kryeministri Kurti.
“Kosova e kupton rëndësinë e integrimit evropian në zemrën e të cilit për Ballkanin Perëndimor në përgjithësi, dhe neve në veçanti, ndodhet Gjermania dhe Franca”.
Kryeministri i Kosovës foli edhe për marrëveshjen e arritur mes Kosovës e Serbisë, për njohjen reciproke të dokumenteve të identifikimit me rastin e kalimit kufitar.
Sipas tij, tani në pikat kufitare mes dy vendeve, vlen reciprociteti.
“Por, liria e lëvizjes duhet të jetë liri e plotë e lëvizjes, duke nënkuptuar njohjen e dokumenteve të Kosovës edhe në kufijtë e Serbisë me vendet e tjera”, tha ai.
“Këtë gjë, zëvendëskryeministri Bislimi është duke adresuar edhe me ndërmjetësit. Për në pikat kufitare ndërmjet Kosovës dhe Serbisë, padyshim që ajo vlen. Veçse unë e kuptoj se nuk mund të kemi liri të cunguar apo të pjesshme të lëvizjes”.
Ndërkohë, me 9 shtator pritet që në Kosovë e serbi të zbarkojë emisari i BE-së për dialogun, Kosovë-Serbi, Miroslav Lajçak, i shoqëruar edhe nga dy këshilltarët, gjermanë e francezë, në përpjekje për të shtyrë përpara normalizimin e marrëdhënieve mes dy vendeve.RTKLIVE