Personaliteti më karizmatik i LDK’së e më simpatik i medieve në Kosovë, pa dyshim ka qenë dhe vazhdon të mbetet Eqrem Kryeziu. Por ai, prej se është në këtë parti, fillimisht në degën e Prizrenit, njihet si njeri parimor e kokëfortë.
Edhe pse kryetar dege, për disa muaj këmba e tij nuk shkeli atë zyrë për shkak të pranisë së një grupi siç e quante ai “puçistë” që vepronte brenda degës.
Por edhe veprimtarisë së tij në politikë duket se i ka ardh fundi. Ai ka thënë se ka ardhur koha që të pensionohet e të largohet nga skena politike.
Në një prononcim për “Bota Sot” Kryeziu thotë se tashmë ka bërë analizat e humbjes së tij, dhe krejt këtë e argumenton me bllokun e 8 partive që kanë qenë kundër tij.
“Gati është e kotë të merresh me politikë të ndershme në këto rrethana, kur çdo gjë është relativizuar”, ka thënë ai.