Mimoza Kusari-Lila, vetëm edhe dy ditë do të jetë pjesë e Qeverisë së Kosovës. Të mërkurën ajo do të japë dorëheqje nga dy pozitat që mban në Qeveri, si zv/kryeministre dhe si ministre për Tregti dhe Industri. Vendimin për dorëheqje Kusari-Lila pritet të marrë pas kandidaturës së saj në zgjedhjet lokale të 3 nëntorit për komunën e Gjakovës nga Aleanca Kosova e Re.
Në një prononcim për Tribunën, Kusari-Lila e ka konfirmuar se të mërkurën është dita e saj e fundit si ministre dhe zv/kryeministre. “Unë të mërkurën e kam ditën e fundit në zyrë. Këtë ditë është takimi i Qeverisë, por do të jetë edhe takimi i Këshillit Kombëtar për Zhvillim Ekonomik, të cilin do ta drejtoj unë. Dhe po këtë ditë e kemi paraparë edhe një konferencë për media në të cilën do ta prezantoj si dorëheqjen ashtu edhe të arriturat që kemi pasur gjatë dy viteve e shtatë muaj të qeverisjes sime”, ka thënë Kusari-Lila.
Ajo nuk ndihet e penduar me vendimin për dorëheqje nga dy postet e rëndësishme në Qeverinë ‘Thaçi 2’.“Tani jam e përkushtuar me procesin që po fillon në komunën e Gjakovës, me fushatën. Besoj që është koha për t’u përmbyllur një cikël që ka filluar në vitin 2009 dhe tani komuna e Gjakovës duhet të meritojë ndryshimin që është duke e pritur”, ka shtuar ajo.