LDK-ja, AAK-ja dhe Nisma për Kosovën, si partnerë të koalicionit, kanë vendosur që vet ta kryejnë punën me Gjykatën Kushtetues, pasi presidentja refuzoi edhe kërkesën e tyre që të kërkojë sqarim për pikën 127 në këtë gjykatë.
Në emër të të gjithë deputetëve të bllokut, LAN-i do ta kërkojë sqarimin e Kushtetueses për pikën 127 për hapat e mëtejmë që duhet ndërmarrë për të dalë nga ngërçi politik, raporton KTV.
Deputeti nga radhët e LDK-së, Nuredin Ibishi, ka thënë se një gjë e tillë do të ndodhë këtyre ditëve dhe se tani Kushtetuesja ka material të bollshëm për të marrë parasysh kërkesën e tyre.
Dëshpërues e ka vlerësuar refuzimin e presidentes, deputetja Donika Kada-Bujupi. Ajo, në rrjetin social Facebook, ka shkruar se presidentja nuk respektoi vendimin e shumicës.
Presidentja e vendit, Atifete Jahjaga, pas refuzimit për të kërkuar sqarime nga Kushtetuesja, ka kthyer sërish topin te liderët që, sipas saj, janë përgjegjës për të dalë nga kriza, transmeton Koha.net.
Ajo e ka vlerësuar si të domosdoshëm një takim të përbashkët të liderëve të partive politike, që të gjejnë një zgjidhje brenda vendimeve të Gjykatës Kushtetuese dhe Kushtetutës së Kosovës.