Krijimi i “Shqipërisë së Madhe” është një thirrje provokuese dhe nxit gjakderdhje në rajon. Kështu ka deklaruar ministri i Jashtëm i Rusisë Segrei Lavrov nga Serbia.
Duke folur për situatën e fundit të ndodhur në Kumanovë, në një takim me homologun e tij serb dhe presidentin Nikoliç, Lavrov tha se sulmet ishin terroriste dhe se Bashkimi Evropian duhet të marrë masa sa më parë për të parandaluar ngjarje të tilla.
“Thirrjet për krijimin e Shqipërisë së Madhe nxisin gjakderdhjen në Ballkan. Asnjë politikan nuk mund të qëndrojë gjakftohtë përpara këtyre thirrjeve”, deklaroi shefi i politikës së jashtme ruse.
Lavrovi i cilësoi ngjarjet në Kumanovë si aksione terroriste.
“Moska është e shqetësuar me atë që po ndodh në Kosovë. BE nuk duhet të marrë qëndrim qyqar. Jam i bindur se në Bruksel e dinë se ç‘po ndodh, por nuk e thonë. BE duhet t’i kushtojë vëmendje të veçantë luftës ndaj terrorizmit”.
Lavrov ka falënderuar po ashtu popullin serb, në veçanti presidentin Tomisllav Nikoliq, i cili ka marrtë pjesë në festimet në Moskë më 9 maj, me rastin e 70-vjetorit të përfundimit të Luftës së Dytë Botërore.
Ndërsa liderët perëndimorë kanë qëndruar larg kësaj ngjarjeje, në shenjë proteste për ndërhyrjen e Rusisë në konfliktin në Ukrainë.