Lidhja Demokratike e Kosovës deri të dielën në orën 19:00 fuqishëm besonte se do t’i fitojë zgjedhjet e 8 qershorit. Pas kësaj ore nuk u pa gjëkundi deri të hënën pasdite kur kreu i saj Isa Mustafa e mblodhi kryesinë e partisë për të diskutuar rezultatet. Në momentin që u bë publik njoftimi për mbledhje, nisën edhe raportimet nëpër media se Mustafa mund të ofrojë dorëheqje nga drejtimi i partisë.
Por në fakt pas takimit doli diçka tjetër. Isa Mustafa as që dha sinjale se po mendon dorëheqjen pas humbjes me një dallim prej 35 mijë votash ndaj PDK-së. “Kemi punë shumë më të rëndësishme me bo tash, do të punojmë do të angazhohemi në mënyrë që t’i kryejmë detyrat tona, zgjedhjet i kemi në vjeshtë të këtij viti, dhe çështja e zgjedhjeve është çështje tjetër”, ka deklaruar Mustafa.
Mirëpo, kur pyetet se pse nuk do të japë dorëheqje, ai gjen një arsyetim interesant; thotë se subjekti që e drejton është më i madhi në vend. “Ne si parti kemi dalë, krahasuar me PDK-në, parti e parë, mirëpo meqenëse atje kemi një koalicion, rezultatet janë të tilla, prandaj mbetet që të presim certifikimin e rezultateve dhe të reflektojë më mirë”, ka thënë mes tjerash ai..