Kryetari i Nismës Socialdemokrate, Fatmir Limaj, ka përkujtuar 15 maturantët nga Malisheva në 16-vjetorin e vdekjes së tyre tragjike.
Ai ka thënë se si në çdo përvjetor tjetër, sjellim në kujtesën dhe dhimbjen e madhe që kishte shkaktuar një nga tragjeditë më të mëdha të pasluftës në Kosovë.
“Vdekja e këtyre të rinjve nuk ishte humbje e madhe vetëm për familjet e tyre, dhe qytetarët e Malishevës, por për të gjithë shqiptarët”, ka shkruar Limaj në llogarinë e vet në “Facebook”.
Postimi i plotë i Limajt:
Sot bëhen 16 vite nga vdekja tragjike e 15 maturantëve të komunës së Malishevës të cilët u aksidentuan derisa po ktheheshin nga një ekskursion në Shqipëri.
Sot, si në çdo përvjetor tjetër, sjellim në kujtesën tonë dhimbjen e madhe që shkaktoi një nga tragjeditë më të mëdha të pasluftës në Kosovë.
Vdekja e këtyre të rinjve nuk ishte humbje e madhe vetëm për familjet e tyre, dhe qytetarët e Malishevës, por për të gjithë shqiptarët. Përgjithmonë në kujtesën tonë!
