Numri i minatorëve kosovarë që po ngujohen nën tokë po vazhdon të rritet, në shenjë proteste për mosekzekutimin e pagave.
Duke parë gjendjen aktuale dhe grevat që kanë nisur nga minatorët, pas një mbledhje të Bordit të Trepçës, të mbajtur sot ka dhënë dorëheqje ushtruesi i detyrës së drejtorit të Trepçës, Hysen Vrajolli.
“Të nderuar minatorë kryeshefi ekzekutiv Hysen Vrajolli ka dhënë dorëheqjen nga pozita U.D. kryeshef ekzekutiv i Trepça Sh.A.”, njofton Sindikata e Re e Trepçës.
Kjo sindikatë u bën thirrje minatorëve të ndërpresin grevën, pasi ju siguron se nesër në mëngjes do t’iu dalin pagat.
“Mjetet që i ka nda qeveria e Kosovës dalin sot ose nesër në mëngjes në xhirollogarinë e Trepça Sh.A. (informatat janë të sakta). Ne si si Sindikatë e re ju ftojmë që të ndërpritet greva dhe të fillojmë me punën”, thuhet në njoftim.
Ndërsa Sabri Ismajli nga Sindikata e Trepçës ka konfirmuar për Reporteri.net se numri i minatorëve që janë nën tokë është mbi 300 persona.
“Të gjitha ndërrimet kanë hyrë në grevë, numri i përgjithshëm është mbi 300”, ka thënë ai.
Ismajli thotë se të gjitha këto parregullsi që po ndodhin duhet njëherë e përgjithmonë t’i thotë stop Ministria e Ekonomisë.