Ka përfunduar ndeshja ndërmjet rivalëve të vjetër në futbollin kosovar, Lirisë e Besës. Takimi është mbyllur pa fitues, 2:2, në një ndeshje në të cilën pejanët dy herë u gjendën në epërsi, por prizrenasit dy herë arritën të barazojnë rezultatin. Sidoqoftë ky epilog mund të jetë më i pranueshëm për Besën, e cila me ngulm po lufton për të siguruar mbijetesën në këtë rang garash, derisa Liria e ka bërë një hap fals në garën për titull të kampionit.
Besa ka kaluar në epërsi në minutën e 14-të me golin e shënuar nga Tihomir Zhivkoviq. Vendësit u kundërpërgjigjën në minutën e 33-të kur barazuan me anë të Rron Gashit, pas harkimit të Florent Avdylit. Megjithatë, gëzimi i tyre nuk zgjati shumë, pasi Fatmir Mullabeqiroviq e riktheu epërsinë e pejanëve në 2:1 në minutën e 38-të. Shifrat u barazuan sërish në minutën e 64-t, kur Zenel Gavazaj shënoi për 2:2, që ishte edhe rezultati përfundimtar. Pas këtij barazimi, Liria mbetet e treta, tani me 42 pikë, ndërsa Besa gjendet në pozitën e dhjetë me 18 pikë.