Partitë opozitare Lëvizja Vetëvendosje, Bashkimi Demokratik, Nisma për Kosovën dhe AAK në Prizren, kanë ftuar përmes një konference për medie qytetarët që të mbështesin iniciativat e opozitës së bashkuar kundër marrëveshjeve për Asociacionin e Komunave Serbe dhe atë të Demarkacionit me Malin e Zi.
Kryetari i Bashkimit Demokratik, Zafir Berisha, tha se qytetarët duhet të mbështesin kauzën e opozitës.
“Pas marrëveshjeve të nënshkruara në Bruksel është duke u vënë në pikëpyetje perspektiva dhe funksionaliteti i shtetit të Kosovës”, ka thënë Berisha .
“Lidhur me ngjarjet e fundit pushteti po ushtron dhunë ndaj zyrtarëve dhe anëtarëve të opozitës, dhe më këtë rast bëri thirrje që të lirohen sa më parë nga masa e paraburgimit deputetja e AAK-së, Donika Kada- Bujupi, dhe aktivistët tjerë opozitarë në krye me zyrtarin e LVV-së në Prizren, Artan Abrashi”.
Deputeti i Lëvizjes Vetëvendosje nga Prizreni, Mytaher Haskuka, gjithashtu ju ka bërë thirrje bashkëqytetarëve që masovikisht të marrin pjesë në manifestimin e paraparë nga opozita për datën 28 Nëntor në Prishtinë, për të kundërshtuar fuqishëm marrëveshjet e fundit nga qeveria e Kosovës.
“ Zajednica” e rrezikon në radhë të parë të ardhmen e fëmijëve tanë”, ka thënë ai.
Thirrje për mbështetje të qytetarëve në kërkesat e opozitës, kanë bërë edhe kryetari I Nismës në Prizren, Sinan Alija dhe zyrtari i AAK-së Bajram Kastrati.
Zyrtarët e këtyre partive, ftuan qytetarët e Prizrenit që të dielën duke filluar nga ora 14;00, që të marrin pjesë në një debat në Shtëpinë e Kulturës “ Xhemajli Berisha”, ku do të diskutohet për gjendjen aktuale në vend dhe për organizimin sa më të mirë të manifestimit paqësor në Prishtinë me 28 Nëntor./TV Prizreni/