Lideri i Lidhjes Demokratike të Kosovës, Isa Mustafa ka thënë se presidentja e vendit ua vazhdoi mandatin gjyqtarëve ndërkombëtar, akt i cili sipas tij i takon Kuvendit të Kosovës dhe jo presidentes, “nga fakti se ligjet dhe marrëveshjet ndërkombëtare nuk janë mbi Kushtetutën”.
“Gjykata Kushtetuese muajin e kaluar solli një vendim sipas porosisë së PDK-së, me të cilin ngatërruan tërësisht zgjedhjen e kryetarit të Kuvendit të Kosovës. Këtë e dëshmuan vet njerëzit e PDK-së të cilët publikisht e shpjeguan vendimin disa ditë pa u publikuar. Pas kryerjes së këtij shërbimi, Presidentja e vendit ua vazhdoi mandatin gjyqtarëve ndërkombëtar, por njohësit e Kushtetutës thonë se ky akt i takon Kuvendit të Kosovës dhe jo Presidentes, nga fakti se ligjet dhe marrëveshjet ndërkombëtare nuk janë mbi Kushtetutën. Do t’i sugjeroja Presidentes që ta sheh qartë se kujt i takon mandatimi i gjyqtarëve të jashtëm me Kushtetutë dhe ta tërheq vendimin e saj. Kosovës nuk i nevojitet një Gjykatë Kushtetuese e cila është e kontestueshme në pikëpamje kushtetuese”, ka shkruar Mustafa në Facebook.