Sot në moshën 73 vjeçare u nda nga jeta pedagogu, liriku e studiuesi i njohur Koçi Petriti. Petriti i cili njihej edhe për tekstet e shumta të këngëve në festivalet e Radiotelevizionit Shqiptar vuante nga një sëmundje e rëndë në mushkri.
Koçi Petriti u lind më 1941 në Sovjan të Korçës. Shkollën fillore e të mesme i kreu në Korçë. Pas një periudhe të shkurtër pune si arsimtar, fitoi të drejtën e studimit në Fakultetin e Historisë dhe Filologjisë në Universitetin e Tiranës, ku u diplomua (1967) për gjuhë dhe letërsi. Me mbarimin e fakultetit, pasi kreu sherbimin ushtarak 2-vjecar, u emërua arsimtar në Librazhd. Më 1990 emërohet në Departamentin e talenteve të reja pranë Lidhjes së Shkrimtarëve dhe Artistëve të Shqipërisë (Tiranë), ndërsa më 1992 Sekretar i Përgjithshëm i kësaj Lidhjeje. Më 1993 emërohet Dekan i Fakultetit të Historisë dhe Filologjisë të Universitetit të Tiranës, ku punoi më pas si pedagog i jashtëm.
Titujt e veprave të K. Petritit:
Lirikat e majit (Tiranë, 1962)
Përsëri në udhë (Tiranë, 1867)
Firma e popullit tim (Tiranë, 1974)
Prush nëpër shekuj (Tiranë, 1979, çmimi: libri më i mirë i vitit)
Lulekuqet (Prishtinë, 1981)
Të dashurova ty (Tiranë, 1988)
Poezia shqipe (kolana e poezisë shqipe, Tiranë, 1989)
Në poetikën e Martin Camajt (Tiranë, 1997)
Lirikat e majit (Tiranë, 2002, ribotim i ndryshuar)
Albumi i lirikave (Tiranë, 2004)
Poezi të zgjedhura (Tiranë, 2005)