Inspektorati i Komunës së Malishevës, ka ndaluar punimet edhe në një ndërtim pa leje në qytetin e Malishevës më saktësisht në rrugën “Iliria”, që gjendet në mini transitin në qytet.
Komuna e Malishevës ka njoftuar se kjo ndërprerje ka ardhur, pasi pronari nuk ishte pajisur me lejet e nevojshme për ndërtim dhe nuk kishte respektuar urdhëresën e mëhershme të inspektoratit, për ndalimin e punimeve.
Drejtori i Drejtorisë së Inspektoratit në Malishevë, Dibran Kastrati tregoi se urdhëresa e dërguar më herët nga inspektorati për ndërprerjen e punimeve nuk ishte respektuar.
“Inspektorati, me datë 28.03.2018, kishte lëshuar urdhër për ndërprerjen e punimeve, mirëpo i njëjti nuk e kishte zbatuar këtë urdhër, ndërsa sot, pas verifikimit në vendin e ngjarjes, inspektorati i ka bllokuar punimet dhe ka vendosur shiritat për ndërprerje të punimeve”, thuhet në njoftim
Kastrati bëri apel për të gjithë ata që duan të ndërtojnë, që të zbatojnë ligjet dhe paraprakisht të pajisen me dokumentet e nevojshme, ku përfshihet edhe leja e ndërtimit, pasi në të kundërtën, nuk do të lejohen ndërtime pa leje.