Nisi ndërtimi i Qendrës së Kulturës në Xerxë

Në fshatin Xerxë nisi ndërtimi i qendrës së kulturës. Në ceremoninë vënies së themelit të qendrës kryetari i komunës Idriz Vehapi tha se kjo qendër ka qenë shumë nevojshme për banorët e kësaj ane. Sot filloi faza e parë e punimeve dhe kostoja e projektit arrin në 300 mijë euro. Ky është ndër vendbanimet më të mëdha të komunës tonë dhe nevoja për një institucion të tillë ka qenë shumë e madhe. Besojmë se kjo do të sjellë dobi të mëdha për këtë komunitet, shtoi kryetari Vehapi.

Ndërsa drejtori i Drejtorisë për Kulturë, Rini dhe Sport Osman Hasku tha s e mungesa e një objekti të kulturës k ndikuar në mungesë të aktiviteteve kulturore e rinore në këtë fshat. Besojmë se pas ndërtimit të objektit jeta kulturore do të gjallërohet, ngase Xerxa ka potencial njerëzor e profesional. Deri më tani aktivitetet kulturore janë zhvilluar nëpër objekte, ndërsa në të ardhmen entuziastët e kulturës do të kenë ku të dëshmojnë vlerat e tyre. Objekti do të jetë shumëfunksional dhe do të mund të përdoret për shumë qëllime, shtoi drejtori Hasku.

Falënderues u shpreh kryetari i fshatit Kapllan Gashi, i cili përkujtoi se grupet artistike që kur kanë qenë mjaft aktive, ka kohë që i kanë përmbyllur aktivitetet kulturore për mungesë të kushteve dhe hapësirës adekuate. Kjo ka qenë nevojë e kahershme, sepse në këto fshatra jetojnë rreth 10 mijë banorë. Në të ardhmen ky objekt do të shërbejë si vatër e kulturës dhe rekreacionit për rupet artistike. Besojmë se kjo qendër do të ndikojë mjaft pozitivisht për të rinjtë, të cilët për mungesë hapësire kanë bredhur nëpër lokale dhe e kanë kaluar kohën kot.

Objekti në fjalë do të ketë 600 metra katror dhe krahas sallës së shfaqjeve do të ketë edhe hapësira të nevojshme për bibliotekë dhe nevoja të tjera të komunitetit. Punimet e fazës së parë do të kryhet në afat prej 100 ditësh, ndërsa për këtë fazë janë ndarë 120 mijë euro, mjete këto të MAPL-së dhe të Komunës së Rahovecit.