Kryetari i komunës së Rahovecit, Smajl Latifi, ka bërë me dije se kanë nisur punimet për fushën e re sportive në fshatin Gexhë.
“Një lajm i mirë për të rinjtë e të rejat, njëherazi për të gjithë qytetarët e Gexhës, është nisja e punimeve për fushën e re sportive. Në praninë e bashkëpunëtorëve dhe qytetarëve të Gexhës, sot vumë themelet e projektit më të ri, që do t’u shërbejë qëllimeve dhe nevojave për aktivitete sportive të gjithëve, pa dallim”, ka thënë Latifi.
Ai ka theksuar se si kryetar komune është i përkushtuar, posaçërisht për të rinjtë, duke krijuar dhjetëra projekte që ndihmojnë aktivitete kulturore, rekreative dhe sportive, në mënyrë që talentet dhe energjitë rinore të mos ndrydhen, por të shprehen e zhvillohen.
“Do të jemi të përkushtuar që projekti të përfundojë në kohë dhe me cilësi”, ka deklaruar kryetari Latifi.