Partitë opozitare dhe shoqëria civile kërkojnë nga Qeveria Komunale e Prizrenit,që të menaxhojë më mirë paranë publike. Sipas tyre, trashëgimi i borxhit në vlerë prej 2.5 milion euro,tregon më së mirë se sa keq po menaxhohet paraja publike.
Këshilltari i Vetëvendosjes,Arbër Rexhaj ka thënë se investimet e ngutshme të Komunës së Prizrenit gjatë fushatës zgjedhore kanë krijuar situatën e ballafaqimit me borxhe të mëdha.
“Investimet për efekte elektorale kanë krijuar gjendjen që sot Komuna e jonë të ballafaqohet me borxhe të shumta të papaguara”,ka thënë Rexhaj,transmeton KD.
“Mospagesa e borxheve e shpie Komunën në një kaos brendamenaxherial dhe na dëshmon se kjo strukturë politike nuk e ka ndërmend të përmisojë menaxhimin e parasë publike”.
Javë me parë edhe Haziz Hodaj i LDK-së ka alarmuar se Komuna e Prizrenit është e zhytur në borxhe dhe në obligime të tjera komunale.
“Kjo komunë ka nevojë më tepër se asnjë tjetër të ketë në krye të dikastereve lokale njerëz të përgjegjshëm dhe përgatitur që të përballen me këto dukuri negative”.
Në anën tjetër,monitoruesja Elmedina Baxhaku nga OJQ”Ec Ma Ndryshe” ka theksuar se defektet me menaxhimin e parasë publike në Komunën e Prizrenit disa herë janë evidencuar në raportet vjetore të Auditorit të Përgjithshëm.
“Ne rekomandojmë kryetarin e Komunës së Prizrenit, që të jetë i kujdesshëm në shpenzimet e parasë publike”./PrizrenPress.com/