Partitë opozitare në Prizren kanë mirëpritur anulimin e vendimit të Kuvendit Komunal për dhënien e autorizimit për huamarrjen në vlerë prej 5 milionë eurove nga Banka Evropiane për Rindërtim dhe Zhvillim.
Sipas opozitës anulimi i këtij vendimi është një lajm i mirë për Prizrenin.
Kryetari i PDK-së në Prizren Shaqir Totaj tha se kryetari i Komunës, Mytaher Haskuka, përmes Kuvendit tentoi të fusë në fajde Prizrenin.
“Ky vlerësim ka shpalosur përpjekjen qëllimkeqe të Ekzekutivit, që me nxitim dhe me kontrabandimin e votave të disa kuvendarëve nga opozita, të ndikojë në miratimin e këtij vendimi në KK”, tha Totaj.
“Haskuka tentoi të fusë në fajde Prizrenin”, u shpreh ai, shkruan “PrizrenPress”.
Kuvendari i AAK-së Ilir Baldedaj e ka vlerësuar lajm të mirë për Prizrenin, anulimin e vendimit të Kuvendit.
“Anulimi i këtij vendimi parandalon futjen e Komunës së Prizrenit në borxhe”.
Ndërkaq, Nisma Socialdemokrate në Prizren ka theksuar se kundërshtimi i tyre ndaj iniciativave të tilla të qeverisë komunale po konfirmohet si qëndrim i drejtë edhe nga vlerësimi i nivelit qendror.
“NISMA Socialdemokrate i ka kundërshtuar disa herë iniciativat e klanit Haskuka në Kuvendin e Prizrenit sepse ka qenë e bindur se pas tyre qëndrojnë interesa djallëzore të krimit të organizuar, të cilat qëndrojnë edhe pas qeverisë së LVV-së në Prizren, dhe për këtë na ka dhënë të drejtë edhe MAPL”, thuhet në komunikatë e Nismës.
Ministria e Financave, Punës dhe Transfereve, ka vlerësuar se vendimi i KK-sw “është në kundërshtim me dispozitat e legjislacionit në fuqi”, për dhënien e autorizimit për huamarrjen në vlerë prej 5 milionë eurove nga Banka Evropiane për Rindërtim dhe Zhvillim .
Kuvendi i Prizrenit muajin e kaluar pati aprovuar huamarrjen nga BERZH-i në vlerë prej 5 milionë eurove, me të cilën parashihet financimi i efiçiencës së energjisë në 100 ndërtesa në pronësi komunale./PrizrenPress.com/