Kinemaja e qytetit të Prizrenit, që për tre vjet ka qenë jashtë funksionit, do ta rindezë ekranin në kuadër të festivalit më të madh të filmit në vend.
Festivali ndërkombëtar i filmit dokumentar dhe të shkurtër “DokuFest” më 5 gusht do ta bëjë inaugurim e kinemasë së brendshme të “Lumbardhit”, shkruan sot “Koha Ditore”.
Gjatë ditëve të festivalit kjo kinema do të shërbejë për shfaqjen e filmave, ndërsa pas “DokuFestit” do të vihet në shërbim të komunitetit. Përveç për shfaqjen e filmave, do të shërbejë edhe si hapësirë për aktivitete të tjera kulturore, varësisht prej kërkesave të komunitetit artistik.
Muajin e kaluar drejtuesit e fondacionit “Lumbardhi” kishin njoftuar se kanë nënshkruar një memorandum bashkëpunimi me degën në Kosovë të organizatës Trashëgimia Kulturore pa Kufij (ChWB) për funksionalizimin e pjesshëm të sallës së mbyllur të “Lumbardhit” dhe përmirësimin e infrastrukturës së përgjithshme të këtij objekti kulturor.