Dega e Partisë Demokratike e Kosovës (PDK) në Malishevë ka drejtuar kritika për Drejtorinë e Arsimit se është duke bërë shkelje të ligjit dhe të rregulloreve mbi arsimin në Kosovë lidhur me shpalljen e konkursit me nr. 11/411 të datës 21.07.2016.
“Në bazë të informacioneve dhe gjetjeve në terren, grupi punues për arsim i PDK-së ka konstatuar gjendjen faktike, e cila fare nuk përputhet me kushtet e parapara me konkurs. Kjo gjendje është pothuajse në të gjitha shkollat fillore, si edhe në tri shkollat e mesme. Prandaj, duke qenë të bindur se arsimi është një e mirë gjithëkombëtare, jemi të shqetësuar me degradimin që po u bëhet shkollave në Komunën e Malishevës, e cila ndikon drejtpërdrejt në uljen e cilësisë në arsim”, është thënë në komunikatën e PDK-së në Malishevë.
Kjo degë e PDK-së ka kërkuar nga MAShT-i dhe zyra rajonale për arsim të ndërhyjë në konkursin e fundit dhe të bëjë presion në Drejtorinë e Arsimit në Malishevë që t’i shpallin vendet e punës. Grupi punues për arsim i PDK-së në Malishevë ka bërë me dije se do t’i publikojë në detaje shkeljet e këtij konkursi, nga i cili janë ruajtur vendet e punës në bazë të përcaktimit partiak.