Përfaqësues të bizneseve dhe ekspertë nuk shprehen të kënaqur me premtimet elektorale gjatë fushatës për zgjedhjet lokale. Sipas tyre nuk ka një strategji reale të zhvillimit ekonomik, por vetëm premtime të momentit.
Partitë politike premtuan shumë gjatë fushatës zgjedhore në fushën e zhvillimit ekonomik, por pak prej tyre kanë arritur të jenë të besueshme. Kryetari i Aleancës Kosovare të Bizneseve, Agim Shahini e thotë këtë duke u nisur nga përvoja.
“E them këtë për arsye se shumë biznese kanë pritur më shumë dhe janë në pritje të vazhdueshme që partitë politike të realizojnë atë që e premtojnë gjatë fushatave elektorale nga viti 2000 e këtej”, transmeton RTK.
Kreu i AKB-së Shahini, thotë se partitë politike qëllimin primar e kanë pushtetin, e jo të zhvillojnë shtetin. “Ata kanë dhënë atë për strategjitë e tyre, projekte ad hoc, por një strategji zhvillimore për Kosovën ende mungon nga të gjitha partitë dhe derisa mungon ne nuk mund të dimë se kah do të na qoj orientimi i zhvillimit, i konkurrencës i bizneseve dhe ekonomisë kosovare”.
Eksperti Nagip Skenderi ndërkaq, thotë se premtimet kishin për qëllim përfitimet në aspektin e marketingut politik, se sa që ishin reale në aspektin e realizimit.
“Në aspektin e përmbushjes së premtimeve nuk mund të qëndrojnë sepse GDP, përkatësisht Bruto Produkti i Brendshëm, krahasuar me atë që premtohet dhe atë që është një ekonomi reale nuk mund ti përmbushë këto obligime dhe këto dëshira që politikanët i kanë shprehur gjatë fushatës”.
Profesor Skenderi njëherit thotë se komunat në realitet vështirë e kanë zhvillimin në mënyrë të pavarur nga niveli qendror:
“Asnjë komunë apo asnjë pushtet lokal nuk mund të qëndrojë në këmbë të veta duke u nisur nga të hyrat vetanake që i ka si komunë apo si pushtet lokal. Dhe në këtë kontekst është direkt i varur prej subvencioneve, gjegjësisht prej dhënieve që pushteti qendror i ndan për pushtetet lokale”.
Prandaj, siç thotë eksperti Nagip Skenderi, premtimet më të mëdha janë bërë nga ata të cilët kanë pushtetin qendror apo nga ata të cilët mëtojnë të marrin pushtetin qendror.