Me një akademi solemne përkujtimore, e mbajtur në sallën e kuqe universale të Qendrës kulturore “Mensur Zyberaj” në Rahovec, u përkujtua 16 vjetori i rënies heroike të heronjve të kombit, Xhelal Hajda – Toni dhe Selajdin Mullabazi – Mici, si dhe tre bashkëluftëtarëve nga Vushtrria, gjegjësisht nga ZO e Shalës së Bajgores, Bektesh Haliti, Hamdi Hajrizi dhe Nezir Ymeri, të cilit ranë bashkërisht duke luftuar me forcat paramilitare serbe afër fshatit Apterushë të Rahovecit.
I pari i Rahovecit, kryetari i Komunës, prof. Idriz Vehapi, thotë se sot e përkujtojmë 16 vjetorin e rrënies së dy trimave, dy kolosëve, dy heronjve tanë, Xhelal Hajda – Toni dhe Selajdin Mullabazi – Mici dhe shokët e tyre të luftës dhe vazhdon: “Toni e Mici ishin komandantët dhe kolosët më transparent në luftë kundër armikut. Ata ranë heroikisht në fushën e nderit bashkë me Bektesh Halitin, Hamdi Hajrizin dhe Nezir Ymerin, në ballafaqim frontal me forcat paramilitare serbe. Rrënia e tyre ishte një humbje e madhe, jo vetëm për familjet e tyre, por për bashkëluftëtarët dhe për tërë popullin e Kosovës. Por edhe pas tyre, bashkëluftëtarët e tyre vazhduan luftën deri në çlirimin e vendit, e Toni e Mici tashmë janë bërë sinonim i luftës”.
Lufta e Tonit dhe Micit ka qenë e drejtë dhe frymëzuese edhe për aleatët tanë, pikësëpari për Shtetet e Bashkuar të Amerikës dhe Bashkësinë Evropiane, dhe për këtë populli i Kosovës do të jetë falënderues, por edhe brezat pas nesh. Toni e Mici, ashtu që ishin bashkë në luftë, bashkë janë edhe në paqe, në një oborr, ku dy tempuj arsimor , shkolla e mesme dhe ajo profesionale mbajnë emrin e tyre”, ka thënë Vehapi.
Në emër të Shoqatave të dala nga Lufta, foli prof.dr. Sabahudin Cena, i cili pasi përshëndeti të gjithë mysafirë të pranishëm, thotë: “Në kushte normale të jetës së njeriut, e cila zgjat aq sa ia ka caktuar njeriut Krijuesi ynë, dhe në rrethana të zakonshme të valëve të jetës nëpër burgje, mërgime e spitale, luftëra e beteja, është shumë e këndshme dhe nuk ka nder më të madh që fëmijët t’i përcjellin në amshim prindërit e tyre, por nga ana tjetër nuk ka gjë më tragjike se dita kur prindërit i përcjellin fëmijët në përjetësi e pastaj në vend të bijve ruhen , rriten dhe shtohen shenjat e kujtesës historike të një populli siç jemi ne të cilët për ta parë këtë ditë, dhjetë kemi lindur e vetëm një na është rritur”.
“Sot këtu në këtë sallë, të kësaj shtëpie që ruan shenjat e kujtesës historike për heroin e Kosovës , Mensur Zyberaj, po p?rpiqemi t’i mbrojmë nga harresa Xhelal Hajdën – Tonin, Selajdin Mullabazin – Micin, të dy heronj legjendar, Hamdi Hajrizin, Bektesh Halitin e Nezir Ymerin. Atë ditë ishte 6 nëntori i vitit 1988, javë e parë e nëntorit historik të Ismail Qemalit, të Halit Gecit e të Adem Jasharit. Ishte pra koha kur vlonte gjaku dhe kur kishte hapur flatra në të gjitha frontet, e Toni dhe Mici, së bashku me tre bashkëluftëtar nga ZO e Shalës së Bajgores , vepronin me përkushtim të madh që të bëhen kurban, ashtu siç i kishte mësuar mësuesi i madh i lirisë, pavarësisë dhe demokracisë, mr. Ukshin Hoti,” përfundoi prof. Cena.
Në vazhdim, kanë folur drejtori i DKA, Behar Rama dhe drejtoresha e shkollës së mesme “Xhelal Hajda – Toni, Remzije Cana, të cilit thanë se ndihen krenar që shkollat mbajnë emrin e këtyre dy kolosëve të lirisë, ndërkaq me pietet të lartë, në emër të familjarëve nga Vushtrria, të pranishmit i përshëndeti Xhavit Bekteshi.
Në fund, për të pranishmit, nxënësit dhe mësimdhënësit e shkollës së mesme “Xhelal Hajda- Toni” kanë përgatitur një program kulturo-artistik me këngë dhe valle popullore, skeçe, recitale, poezi dhe një mini dramë./RahovecPress/