Kryetari i Partisë së Pavarur Liberale (SLS), Sllobodan Petrovic, ka deklaruar se zgjedhjet e reja në Kosovë janë të panevojshme.
Por megjithëkëtë serbët në Kosovë do të jenë të gatshëm për to, nëse ato shpallen.
Petrovic, partia e të cilit në zgjedhjet e 8 qershorit u paraqit si pjesë e Listës Serbe, ka thënë për agjencinë e lajmeve “Tanjug” se është mendim i përgjithshëm që zgjedhjet janë më së paku të nevojshme në këtë moment, pasi edhe ashtu, sipas tij, është humbur shumë kohë kurse punët që presin janë të shumta.
“Në ana tjetër, nëse nuk gjendet mënyrë për të dalë nga kriza përkatësisht nga vakuumi politik, zgjedhjet janë alternativa e vetme. Deputetët e Listës Serbe mbajnë qëndrimin që zgjedhjet e reja janë zgjidhje më pak e mirë, por gjithsesi, nëse shpallen zgjedhjet e reja ne jemi të gatshëm edhe për atë variant”, ka deklaruar Petrovici, citon lajmi.net.
Ai ka përsëritur se Lista Serbe do t’i japë përkrahjen atij grupimi politik, i cili do të sigurojë shumicën dhe se një qëndrim të tillë do ta mbajë edhe në tentimin e ardhshëm për zgjedhjen e kryeparlamentarit.
Petroviq ka theksuar se për Listën Serbe procesi i zgjedhjes së kryetarit të Kuvendit të Kosovës dhe e përkrahjes së qeverisë së ardhshme janë dy procese krejtësisht të ndara. Ai ka bërë me dije se Lista Serbe ka platformën e cila paraqet “interesin e komunitetit serb në Kosovë”.